Sintakan in Panji Mu Tausug

Pagdatung sin Kastila' pa Pilipinas, asal awn panji sin Tausug. Barma'na in kalimayahan sin Tausug bukun ampa liyali -- Kari asali.

.

In panji sin Tausug bukun kimiyab ha babaan sin unu-ununa pamarinta. Matampal in Sarsila ini.

.

Bang ampa magsintak in Tausug, sari'di' nangaku daugna in Tausug daying ha angay.

.

Wahay kau Tausug ayau nakau magsintak sin panji mu karna' asalda yadtu ha taas. In panji piyagbahasa sin nanulat bukun amun kimikiyab kakana'. Unu in lagi sin kakana' panji hisintak bang in pamarinta kabayaan di' da hikapamarinta. Biya' sin panji kakana' sin Pilipinas sisintak pataas sin sumagawa' natutuhugda in ilong sin Milikan?

.

In sabunnal panji amuna in maruwa sin Tausug. Di' tumagad tatabangan daying ha dugaing pihak. Karna' sin Tausug awn sipug! Sumagawa' bang taghana-hana dihilan mangi' isab in di' tumabuk. Yan in Tausug! Way hiyuwat-huwat dugaing amura in Tuhan Maha Kawasa.

.

In panji kimikiyab yan subay makauna daying sin panji maruwa halaum atay sin tiyap-tiyap Tausug masintak. Maruwa wala' kiyararapatan! Kiyapatanna?

.

Tausug, gagandilan di' tumukku' ha satru', yan in purna' Tausug. Wala' piyasaran in hula', sarta' malasa di' pagtaykuran. Misan maabu bangkit?

.

Panji sin Tuhan Rahman in salingkat-lingkat kumiyab ha taas. Bukun panji sin mag-aagau iban manglulungkup hula', mangdararagang banyaga'.

.

Bang magmanja'na in panji sin Kasultanan nag-agau, nag-sanda' sin Sabah, iban magpamanyaga' ha waktu nakauna, na' magu-ununa in kaadilan?

.

Panji Rahman, ulung iban lasa in manaimbabau subay ha Lupa' Sug. Panji sin kasalamatan nagdara rahmat bukun hat pa Tausug, sumagawa' samasta' alam.

.

Buat malayingkan bang in Kasultanan yan mahambuuk sila, in manga magpopolitik yan magtaubatna, magjijihad ha guwa' sara' magpindana sarta' maghambuuk sila katan, andu' hipagmarai' ku ampa hidul sin Tuhan in sabunnal panji hikasintakna pa ayan sawasa'. Ameen!

Tausug Piyaruli in Pagpihak

Daying namayan ha guwa' sampay palaum net in Tausug piyaparuli in pagpihak daying sin paghambuuk. Ha maniyu'-tiyu' pikilan sin simulat bang daran sabbutun sin manunulat iban sin maghimumungan in pihak sin pakaniya-pakaniya mabuhi' in kayu sin pagpulak-kanat.

Bang awn kalammahan sin hambuuk pihak labi apdal bang pagminnu-minnuhan daying sin magtuy hisilawak. Wayra isab baha' mangaku in siya di' magkalaung?

Lapi apdal in paghiyati-hiyatihi daying sin pagtaksil.

Bang awn kalaungan sin hambuuk nakura' labi apdal in alupun siya sarta' hipamung in mapait bang in kaunan sin mapait yan ubat. In magpaandig mahinag dan hikapalaggu' sin fithna?

Ha di' pa lumuag in simud sin dugaing bangsa ha paghikhikan bang baha' in Tausug magulung-iyulungi?

Adapun in abutan sin laum indan, kajuljanaan pa antara sin naglalaum indan.

Tausug Nabanyaga' sin Kawasa

Wahay kau bangsa ku, ha tandawan sin kaliruan matampal kau piyantau sin dunya nag-agau kawasa.

Bukunka ha nakauna natandau kau daying ha kalayuan bilang bangsawan? Tausug gagandilan? Bayan buddiman kau wahay bangsa ku.

Halul akkal, bayan buddiman
Gagandilan wala' kiyarapatan
Nananakus barong, o pipisan
Simusupa' mama' hipu' sin pamulansang
(daying ha Tarasul Tausug Gagandilan siyulat hi Nur Danial)

Ha waktu ini, andu' agun-agun karapatanna in ngan mu sin pag-agau kawasa sin magpopolitik iban kasultanan.

Hi patindug naisab magbalik in kamahardikaan mu silawak sin tumpukan Bangsa Tausug Naghambuuk (UTC) ah siyulat hi Neldy Jolo. Sin masi-masira mahardika' ha jawab hi Nur Danial.

Kami Bangsa Tausug
Mahardika namaugbug
Limaya daing ha satru
Timindug di' magpapissuku
(daying ha Tausug National Anthem biyaktul sin Hambuuk Tausug bata' ba'gu manunulat, Neldy Jolo)

Myta' napissuku'na kau? Bukun ka hi maas Sasapan maglibutan sin southeast Asia manulut iban magdirihil tabang daying ha kabangsa-bangsahan napissuku'? Hainna in bulangsang hi Maas Ilidji imagpang ha Kastila' ha bayta' hi Sultan Ismael Kiram?

Mayta' iyuna in pag-agau kawasa daying sin pamulansang umatu' hakasigpitan biya'na sin kabuhianan?

Andu' kailu in bangsa ku iyumpananman kawasa sin parinta Final Peace Agreement ha tahun 1996, nabiya' itik naglungtud pa sapa' daying ha nakura pa bata' tabiya'. Kiyatandawan naisab in kalammahan mu. Biya' kau amu' mag-agau saing. Ununa isab in sumunu' pag-agawan? Hangaslag-ngaslag Lupa' Sug. Magsamit-samit in kasultanan ha sa'bu isab piyagpipirit-pirit sin magpopolitik.

Bukunka in ini hambuug kaaiban? Maingkan kiyahahatihan sin tiyap-tiyap Tausug in kawasa maglabay iban di' mara mapatay.

In panghati ku in kawasa makapasanyang, ha adlau ini kiyatandawan ku ha bangsa maisug in kawasa makapamanyaga' ha mag-aagau.

Tandawan

Salam! In kabuhi' biya' sapantun tandawan sin akhirat. Lugay nanandau-tandau mataud kakitaa'nsin hambuuk barnyawa tutukasan ha dunya. In tandawan.blogspot.com bukisan sin simulat in pangatud sin sin mata pa pangatud asli amuna in pangatud sin mata sin pangatayan atawa 'basira'. In Basira pangatud timubud daying ha akkal, pangnanam, iban rahasia'.

Ha panandau-tandau natu' langan-langanun kamu sin simulat pa ayan sin kasabunnalan hasupaya sama-sama makasaksi' sin haliyu sin kurtina.

Daying ha sabab yadtu andu' kailu manaabbiti kami, ibanni kami nanandau.